“Ҳудудгаз Қашқадарё” газ таъминоти филиали моддий ресурслардан оқилона фойдаланиш ва коррупцияга қарши сиёсатни амалга ошириш ҳамда юридик шахсларга табиий газни етказиб беришни назорат қилиш бўлимлари ҳамкорлигида аҳоли ўртасида табиий ресурслардан ноқонуний фойдаланишга қарши тегишли чора-тадбирлар олиб бормоқда.
Биргина жорий йилнинг 1 сентябридан 30 сентябрига қадар “Ҳудудгаз Қашқадарё” газ таъминоти филиали томонидан ўтказилган тадбирлар доирасида 119 млн сўмлик табиий газни талон-торож қилиш ҳолатлари аниқланди.
Мисол учун, Ғузор тумани Чаноқ маҳалласида ўтказилган рейдлар давомида, Истиқлол кўчаси 37-уйда яшовчи истеъмолчининг хонадонида табиий газдан фойдаланиш юзасидан хатлов ўтказилганида, уй эгаси 8 дона газ сарфи юқори бўлган горелкалардан фойдаланиб, оҳак пишираётгани маълум бўлди. Қайта ҳисоб-китоб қилиш комиссиясининг хулосасига кўра, хонадон томонидан “Ҳудудгаз Қашқадарё” газ таъминоти филиали манфаатларига 67 млн. сўмлик моддий зарар етказилган.
Шунингдек, ушбу маҳаллада яшовчи яна бир хонадон эгаси ҳам табиий газ тармоғига ноқонуний равишда тўғридан-тўғри уланиб, оҳак маҳсулотлари ишлаб чиқараётганлиги фош қилинди. Текширувлар натижасида фуқаро томонидан давлат манфаатларига 33 млн. сўм миқдорида моддий зарар етказганлиги аниқ бўлди.
Ҳозирда мазкур ҳолатлар бўйича тегишли ҳужжатлар расмийлаштирилди.
Хулоса қилиб айтганда, айрим тадбиркорлар мўмай даромад орттириш мақсадида энергия ресурсларидан ўзбошимчалик билан уланиб, фойдаланишнинг турли усулларини ўйлаб топишади. Бу ноқонуний ҳатти-ҳаракаталар эса бир кун келиб, инсоннинг бошини ҳам қилиб қўйишини унутмаслигимиз лозим.
“Ҳудудгаз Қашқадарё” газ таъминоти филиали матбуот хизмати
878
