"Hududgazta’minot" акциядорлик жамиятининг Коррупцияга қарши сиёсатини амалга ошириш ва табиий ресурслардан оқилона фойдаланиш бошқармаси ва "Hududgaz Xorazm" газ таъминоти филиалининг тегишли бўлимлари томонидан Хоразм вилояти Давлат хавфсизлик хизмати бошқармаси билан ҳамкорликда газ таъминоти тизимига ноқонуний уланишларни аниқлаш бўйича навбатдаги рейд тадбири ўтказилди.
Қиш арафасида ва умуман, энергия манбаларига талаб ортиб бораётган даврда қонунларни четлаб ўтиб, газдан ўғринча фойдаланаётган ҳуқуқбузарларга нисбатан "Hududgazta’minot" АЖ томонидан жиддий чоралар кўрилмоқда.
Хусусан, Урганч шаҳридаги "Саноатчилар" кўчасида жойлашган "Жаҳонгир" МЧЖ ҳудудида ғишт пишириш учун 20 та ҳумдон (камера) аниқланди. Мазкур ҳумдонлардан 5 таси ҳеч қандай ҳужжат ва рухсатномаларсиз, газ тақсимлаш қурилмаси (ГТҚ) тамғаларини яроқсиз ҳолга келтирган ҳолда ҳамда қўшимча ўрнатилган газ жўмраги орқали полиэтилен қувурлар орқали тўғридан-тўғри тармоққа уланиб, ғишт пиширилаётганлиги аниқланди.
Бундан ташқари, "Жаҳонгир" масъулияти чекланган жамиятига қарашли чойхона ҳам табиий газдан фойдаланиш қоидаларини қўпол равишда бузиб фаолият кўрсатаётгани аниқланди. Лойиҳа ҳужжатларига кўра, ушбу овқатланиш объекти темир қувурлар билан газлаштирилиши керак бўлган бўлсада, амалда эса, полиэтилен қувурлар орқали газга уланиб, таом тайёрлаш учун мўлжалланган қўлбола 12 та комфоркали ускуналардан фойдаланиб келинган. ГТҚга улаш учун ишлатилган резина шланглар, 3 та газ ёндиргич (горелка) ва ғишт намуналаридан ашёвий далил сифатида таҳлил учун олинди.
"Жаҳонгир" МЧЖ томонидан ушбу қонунбузарлик ҳолати натижасида, газ етказиб берувчи ташкилотларга жами 440,8 миллион сўм зарар етказилган. Корхона ҳозирда газ таъминотидан тўлиқ узилди. Мазкур иш бўйича барча ҳужжатлар амалдаги қонунчиликка мувофиқ чора кўриш учун, ҳуқуқни муҳофаза қилиш органларига тақдим этилди.
"Hududgazta’minot" АЖ матбуот хизмати
1239
