Ўзбекистон Республикаси Энергетика вазирлиги шуни маълум қиладики, куз-қиш мавсумига пухта тайёргарлик кўриш ҳамда станциянинг тўлиқ қувватларда ишлашини таъминлаш мақсадида жорий йилнинг 9-11 октябрь кунлари фаолияти вақтинчалик тўхтатилган Тўрақўрғон иссиқлик электр станцияси (ИЭС)нинг иккита буғ-газ қурилмаси фаолияти тикланди.
Ушбу буғ-газ қурилмаларининг ишга тушурилиши билан Тўрақўрғон ИЭСда ишлаб чиқариладиган электр энергиясининг белгиланган қувватларда узатилиши йўлга қўйилди.
Таъкидлаш лозимки, станцияда ўрнатилган буғ-газ қурилмаси мамлакатимиз ИЭСларида жорий этилган энг етакчи энергосамарадор ускуна ҳисобланади. Умумий қуввати 900 МВт бўлган ушбу қурилмалар бир суткада
21 млн.кВт⋅соат электр энергияси ишлаб чиқаради. Шу билан бирга, станциянинг фойдали иш коэффициенти 57 фоиздан ортиқни ташкил қилади. Бунда йилига 730 млн. куб метр табиий газ иқтисод қилинади.
Тўрақўрғон ИЭС буғ-газ қурилмаларининг жорий кўригидан сўнг, мазкур электр станция 2020-2021 йиллар куз-қиш мавсуда, жумладан ҳарорат пасайган электр энергияси истеъмолининг юқори соатларида самарали ва узлуксиз электр энергияси ишлаб чиқариш имкониятига эга бўлди.
Ўзбекистон Республикаси
Энергетика вазирлиги Матбуот хизмати
1106
