Маълумки, гидроэнергетика соҳасида сўнгги беш йилликда анъанавий равишда ўтказилиб келинаётган “Гидроэнергетика. Марказий Осиё ва Каспий” бешинчи халқаро анжумани ва кўргазмаси 2021 йилнинг 17-18 февраль кунлари Тошкент шаҳрида ташкил этилиши режалаштирилган. Алоҳида таъкидлаш жоизки, ушбу тадбир гидроэнергетика йўналишида мамлакатимизда илк маротаба ташкил этиладиган халқаро кўламдаги йирик анжуман ҳисобланади.
Ушбу анжуман минтақалардаги гидроэнергетика соҳасининг ривожланиши ва тараққий этиши, гидроэнергетик иншоотларнинг қурилиши, модернизацияси, муаммо ва истиқболлари бўйича ўзига хос ўзаро тажриба алмашиш, узвий ҳамкорлик ва мулоқот майдончасидир.
Ушбу анжуманнинг асосий иштирокчилари – Марказий Осиё ва Каспий минтақалари вакиллари – Ўзбекистон, Тожикистон, Қозоғистон, Қирғизистон, Озарбайжон, Эрон, Арманистон, Россия, Грузия, Туркия давлатлари саналади.
2021 йил февраль ойида ўтказилиши режалаштирилаётган анжуманда “Ўзбекгидроэнерго” АЖ асосий стратегик ҳамкор ҳисобланади. Куни кеча, ушбу халқаро анжуман олдидан тайёргарлик ишларига бағишланган онлайн шаклдаги вебинар бўлиб ўтди. Мазкур йирик тадбирда 150 дан ортиқ давлатлар вакиллари иштирок этиши кўзда тутилмоқда.
Таъкидлаш жоизки, гидроэнергетика соҳасида амалга оширилаётган кенг кўламли ишлар, соҳадаги янги инновацион технологиялар ҳамда хорижий инвесторларни фаол жалб қилиш, олиб борилаётган ҳамкорлик алоқаларини янада мустаҳкамлаш мақсадида мазкур тадбир ҳар йили ўтказилиб келинмоқда.
Мунтазам равишда ўтказиб келинадиган мазкур тадбирларда мамлакатимиз номидан “Ўзбекгидроэнерго” АЖ доимий ва фаол тарзда иштирок этиб келмоқда.
Мазкур йирик анжуман қуйидаги йўналишларда ўз ишини олиб боради:
– янги йирик ва ўрта гидроэлектр станцияларини қуриш тажрибалари;
– мавжуд ГЭСларни модернизация қилиш борасидаги амалий ишлар;
– кичик ва микро ГЭСларни қуриш;
– ишлаётган гидроэлектр станцияларни рақамлаштириш;
– ГЭС ускуналарини модернизация қилиш ва техник қайта жиҳозлаш, ишлаб чиқариш активларини самарали бошқариш тизимлари;
– ГЭСларни рақамлаштириш ва автоматлаштириш стратегиясини ишлаб чиқиш ва оптималлаштириш;
– Объектларни диагностика қилиш ва мониторинг қилиш тизимини такомиллаштириш;
– ишлаб чиқаришни маҳаллийлаштириш ва бошқалар.
Тадбир олди бўлиб ўтган онлайн учрашувда “Ўзбекгидроэнерго” АЖ Хорижий молия ташкилотлари билан ишлаш, лойиҳаларнинг ТИАни тайёрлаш, экспертизадан ўтказиш ва тасдиқлашни ташкил қилиш бўлими бошлиғи Х.Хасанов иштирок этиб, ушбу йирик тадбирга олиб борилаётган тайёргарлик ишлари ҳамда “Ўзбекгидроэнерго” АЖ томонидан соҳада олиб борилаётган инвестициявий лойиҳалар тўғрисида маълумот берди. Вебинарда, шунингдек, гидроэнергетика тармоғини ислоҳ қилиш давлат томонидан қўллаб-қувватланиши ҳамда соҳанинг янги истиқболли лойиҳалари ҳақида сўз борди.
Шу билан бирга, онлайн вебинар иштирокчиларига мамлакатимизда ушбу тизимда амалга оширилаётган муваффақиятли лойиҳалар, жумладан, жорий йилда ишга туширилиши режалаштирилаётган “Қамчиқ” кичик ГЭС, “Зарчоб” ГЭС-1 ҳамда ҳозирда лойиҳа-қидирув ишлари олиб борилаётган янги йирик “Муллалак” ГЭСи тўғрисида ҳам атрофлича маълумот берилди.
Шу ўринда, “Ўзбекгидроэнерго” АЖ томонидан амалга оширилаётган бу каби лойиҳалар конференция иштирокчиларида катта қизиқиш уйғотди.
Тадбир давомида вебинар иштирокчиларини қизиқтирган саволларга батафсил жавоб қайтарилди.
Ўзбекистон Республикаси Энергетика вазирилиги Матбуот хизмати
“Ўзбекгидроэнерго” АЖ Ахборот хизмати билан ҳамкорликда
821
