Ўзбекистон Республикаси Энергетика вазирлиги лойиҳаси асосида Андижон вилоятининг Улуғнор туманидаги Жаннатобод МФЙ ҳудудида “SOLAR POWER” МЧЖ томонидан кичик қуёш электр станцияси ўрнатилган артезиан сув қудуғидан фойдаланилмоқда.
Ичимлик суви қудуғига қуввати 5 киловатт бўлган кичик қуёш электр станциясини ўрнатиш орқали 2 минг нафар аҳоли сув билан таъминланади. Умумий қиймати 52 миллион сўмлик мазкур лойиҳа йилига 44 минг киловатт соат электр энергиясини иқтисод қилиш эвазига уч йилга бормай ўзини қоплайди.
Мазкур қуёш электр станциясининг қулайликлари шундаки, ташқи электр таъминотисиз аҳоли хонадонларига ичимлик суви етказиб беради. Бунда ташқи электр таъминотида узилишлар юзага келганда ҳам аҳоли хонадонларига ичимлик сувини узлуксиз равишда етказиб бериш имконияти таъминланади.
Мазкур сув қудуғидаги двигателнинг (сув насоси) барқарор ишлаш даври узаяди. Яъни энерготизимда юклама ортиб, кучланиш ошиб ёки пасайиб кетиши натижасида двигателнинг реле ҳимояси ёки обмоткаларига зиён етказмайди.
Шунингдек, “Сувоқава” ДУК ҳамда электр таъминоти корхоналари ўртасида тузилган шартномага асосан қарздорлик юзага келмаслиги таъминланади. Бунинг натижасида эса ундирилган маблағлар ҳисобига сув қудуқлари, сув тақсимлаш иншоотлари ва бошқаларни “Сувоқава” ДУК томонидан эксплуатация қилиш имконияти кенгаяди.
Ўзбекистон Республикаси
Энергетика вазирлиги Матбуот хизмати
1206
