Жорий йилнинг 19 октябрь куни Энергетика вазирлиги Штаби томонидан Хоразм вилоятининг кўмир соҳаси объектлари ҳамда ижтимоий соҳа муассасаларининг кўмир маҳсулотлари билан таъминланиш ҳолати ўрганилди.
Ўрганиш жараёнида Хоразм вилоятидаги Урганч, Боғот, Хонқа кўмир омборлари ҳолати таҳлил қилинди. Омборлардаги кўмир маҳсулотлари ўрнатилган тартиб бўйича сақланмоқда. Келтирилган кўмир фракциясининг куллик даражаси 30-35 фоиз. Қолган 65-70 фоизи йирик фракциялик кўмирни ташкил қилмоқда.
Бунга сабаб, Ангрен кўмир конида қазиб олинаётган кўмир қўнғир кўмир турига мансуб бўлганлиги сабабли, уни вагонларга ортишда, ташиб келтиришда, омборга тушириш ҳамда истеъмолчиларга юклаб беришда йирик кўмир фракциялари тез ва осон майдаланади.
Шунингдек, Урганч кўмир омборига ўрнатилган Жанубий Кореядан келтирилган кунлик ишлаб чиқариш қуввати 100 тонна бўлган брикет цилиндрсимон узунлиги ва қалинлиги 15 см бўлган брикет маҳсулотлари ишлаб чиқарилмоқда. Ёниш учун жуда қулай бўлган брикет маҳсулотлари махсус қопларга солиниб истеъмолчиларга етказиб берилмоқда.
Кўмир омборларида истеъмолчилар томонидан кўмир маҳсулотлари манзилларига ташиб кетиш учун авто ва мототранспорт воситалари ташкиллаштирилган. Омборларига ташриф буюрган аҳоли ҳамда маҳалла жамғармаси вакиллари билан суҳбат ўтказилди.
Шунингдек, Урганч туманидаги 11 ва 46-умумтаълим мактабларининг кўмир билан таъминланиш ҳолати ўрганилди. Муассасаларда кўмир заҳираси яратилган, кўмир маҳсулотлари усти ёпиқ, махсус омборларда сақланмоқда.
Ўрганиш даврида бу йил омборларга олиб келинаётган кўмир маҳсулотларининг сифати ўтган йилларга нисбатан яхшиланганлигига муассаса раҳбарияти ҳамда аҳоли истеъмолчилари томонидан ижобий муносабат билдирилди.
Маълумот учун: Хоразм вилоятида “Ўзбеккўмир” АЖга қарашли “Кўмир таъминот” МЧЖ филиалининг 13 та кўмир омборлари мавжуд бўлиб, омборларда 13 та автоюклагич, 11 та автотарози, 6 та МАН ва 22 та ИСУЗУ юк автомобиллари билан таъминланган. Филиал томонидан мавсумида бюджет ташкилотларига 14,4 минг тонна, аҳоли истеъмолчиларига 85,0 минг тонна жами 99,4 минг тонна, кўмир ва брикет маҳсулотлари етказиб бериш белгиланган.
Айни пайтда кўмир омборларида жами 3,4 минг тонна кўмир маҳсулотлари заҳираси мавжуд.
Вазирлик штаби томонидан республика ҳудудларидаги электр, газ ва кўмир таъминоти корхоналари томонидан куз-қиш мавсумига тайёргарлик ишларининг ҳолатини танқидий ўрганиш ва муаммоларни жойида бартараф этиш ишлари давом эттирилмоқда.
Энергетика вазирлиги Матбуот хизмати
1062
