Жорий йилда бутун дунё бўйлаб коронавирус пандемиясининг ҳукм сураётганлиги ҳамда ушбу мураккаб вазиятнинг юртимиз иқтисодиётига салбий таъсир кўрсатаётганлигига қарамасдан, Ҳукуматимиз томонидан амалга оширилаётган оқилона чора-тадбирлар натижасида республикамиз иқтисодиётининг ўсиш суръати сақланиб қолинишига эришилди. Натижада, халқаро рейтинг агентликлари “Fitch Ratings” ва “Standard and Poor’s” томонидан Ўзбекистон Республикасига суверен кредит рейтинги баҳоси тегишли тартибда “BB-” (барқарор) ва “B+” (барқарор) даражаларида берилди.
Шу билан бирга, “Ўзбекгидроэнерго” акциядорлик жамияти томонидан Ўзбекистон Республикаси Президентининг 2018 йил 21 июлдаги “Ташқи молиялаштириш манбаларини диверсификациялаш бўйича қўшимча чора-тадбирлар тўғрисида”ги ПҚ-3877-сон ҳамда 2020 йил 24 февралдаги “Молиявий ҳисоботнинг халқаро стандартларига ўтиш бўйича қўшимча чора-тадбирлар тўғрисида”ги ПҚ-4611-сон қарорлари ижросини таъминлаш мақсадида жадал ишлар амалга оширилди.
Хусусан, “Ўзбекгидроэнерго” АЖ ижро аппарати тизимида 2020 йилнинг март ойида “Молиявий ҳисоботнинг халқаро стандартлари”(МҲХС) бўлими ташкил этилиб, дунёнинг етакчи “тўртлик” аудиторлик ташкилотларига кирувчи “PricewaterhouseCoopers” халқаро аудиторлик ташкилоти билан ҳамкорлик асосида “Ўзбекгидроэнерго” АЖ молиявий фаолияти халқаро стандартлар талабларига биноан аудиторлик текширувидан ўтказилди.
Ушбу йўналишда олиб борилган жадал ишлар натижасида, 2020 йилнинг октябрь ойида “Ўзбекгидроэнерго” АЖ ва унинг тизим корхоналарининг 2017-2019 йиллар МҲХС асосида тайёрланган “биринчи татбиқ этилган” консолидацияланган (умумлашган) молиявий ҳисоботига “PricewaterhouseCoopers” халқаро аудиторлик ташкилотининг ижобий хулосаси олинди.
“Ўзбекгидроэнерго” АЖнинг молиявий барқарорлигини ва инвестицион жозибадорлигини аниқлаш мақсадида, жорий йилнинг июнь ойида Жамиятнинг халқаро кредит рейтингини олиш учун жаҳоннинг етакчи “учлик” рейтинг агентликларидан бири ҳисобланган “Fitch Ratings” халқаро рейтинг агентлиги билан шартнома имзоланди.
“Fitch Ratings” халқаро рейтинг агентлиги “Ўзбекгидроэнерго” АЖнинг нафақат молиявий-иқтисодий ҳолатини ўрганди, балки унинг корпоратив бошқарув тизимини, бизнес стратегиясини, ички норматив ҳужжатларининг юритилиши ва бошқа йўналишларни чуқур ўрганиб, таҳлил қилди.
Жамиятимизда фаолият юритаётган минглаб ишчи-ходимларнинг меҳнати самараси ва рейтинг агентлиги томонидан олиб борилган ўрганишлар, чуқур таҳлиллар ҳамда корхоналар фаолиятининг одил баҳоланиши натижасида, куни кеча Жамиятимиз республикамизда ишлаб чиқарувчи корхоналар орасида биринчи бўлиб “Fitch Ratings” халқаро кредит рейтингининг “B+” (барқарор) даражасини қўлга киритди.
Мазкур рейтинг даражаси, “Ўзбекгидроэнерго” АЖни жаҳоннинг машҳур инвесторлар бозорларига аниқ ва равшан бизнес стратегиясига, шаффоф молиявий ҳисоботларига ва кучли корпоратив бошқарув тизимига эга биринчи ўзбек ишлаб чиқарувчи корхонаси сифатида танитади.
Қўлга киритилган мазкур ютуқ, келгусида “Ўзбекгидроэнерго” АЖнинг иқтисодий барқарорлигини янада оширишга хизмат қилади ҳамда инвестиция лойиҳаларини амалга оширишда хорижий кредитларни давлат кафолатисиз тўғридан-тўғри инвестиция маблағларини жалб қилиш имкониятини беради.
Шу билан бирга, “Fitch Ratings” халқаро рейтинг агентлиги томонидан берилган “B+” (барқарор) даражасидаги рейтинги, келгусида Жамиятимизга ўз евробондларини Лондон фонд биржасига жойлаштириш имкониятини беради.
“Ўзбекгидроэнерго” АЖ ушбу ютуқ билан чегараланиб қолмайди, келгуси йилларда рейтинг даражасини янада ошириш ҳамда уни барқарор сақлаб қолиш йўлида изчил ва жадал фаолиятни давом эттиради.
"Ўзбекгидроэнерго" АЖ Матбуот хизмати
1185
