Энергетика вазирлигининг куз-қиш мавсумига тайёргарлик кўришни мувофиқлаштириш Штаби томонидан Бухоро вилоятига чиққан ҳолда кўмир соҳаси объектлари ҳамда ижтимоий соҳа муассасаларининг кўмир маҳсулотлари билан таъминланиш ҳолати ўрганилди.
Ўрганиш жараёнида Бухоро вилоятидаги Когон, Жондор, Олот, Қоракўл, Вобкент кўмир омборлари ҳолати таҳлил қилинди. Кўмир омборларида истеъмолчилар томонидан кўмир маҳсулотлари манзилларига ташиб кетиш учун авто ва мототранспорт воситалари ташкиллаштирилган.
Шунингдек, Жондор туманидаги 15 ва 16-умумтаълим мактаблари, Бухоро туманидаги 32, 33, 43-умумтаълим мактаблари ҳамда 44-сон мактабгача таълим муассасасининг кўмир билан таъминланиш ҳолати ўрганилди. Барча муассасаларда кўмир заҳираси яратилган, кўмир маҳсулотлари усти ёпиқ, махсус омборларда белгиланган тартиб асосида (устки қисми лойланган ҳолда) сақланмоқда.
Ўрганиш даврида бу йил омборларга олиб келинаётган кўмир маҳсулотларининг сифати ўтган йилларга нисбатан яхшиланганлигига истеъмолчилар томонидан ижобий муносабат билдирилди.
Бундан ташқари, вилоятнинг кўмир истеъмолчилари сони энг катта бўлган Ғиждувон тумани аҳолисига қулайлик яратиш мақсадида, Ғиждувон туманига қўшимча кўмир омбори ташкил этиш ишлари олиб борилмоқда.
Истеъмочиларга кўмир маҳсулотларини манзилли етиб боришини таъминлаш мақсадида, Давлат хавфсизлик хизмати Бухоро вилояти бошқармаси, Ички ишлар бошқармаси, Бош прокураткура ҳузуридаги Департаментининг Бухоро вилоят бошқармаси ҳамда Давлат солиқ бошқармаси ҳамкорлигида аҳолини ва ижтимоий соҳа объектларини 2020-2021 йиллар куз-қиш мавсуми даврида кўмир маҳсулотлари билан таъминланишини назорат қилиш бўйича ишчи гуруҳ ташкил этилган ҳамда доимий назорат ўрнатилган.
Бухоро вилоятида “Ўзбеккўмир” АЖга қарашли “Кўмир таъминот” МЧЖ филиалининг 5 та кўмир омборлари мавжуд. Кўмир омборлари 5 та автоюклагич, 5 та автотарози, 1 та МАН ва 1 та ИСУЗУ юк автомобиллари билан таъминланган. Филиал томонидан мавсумида бюджет ташкилотларига 10 минг тонна, аҳоли истеъмолчиларига 30 минг тонна кўмир ва брикет маҳсулотлари етказиб бериш белгиланган.
Бугунги кунда ижтимоий соҳа муассасалари кўмир маҳсулотлари билан тўлиқ таъминланган. Аҳолига кўмир сотиш ишлари олиб борилмоқда. Бундан ташқари, кўмир омборларига аҳоли учун иссиқлик қуввати юқори бўлган 4,5 минг тонна импорт кўмир маҳсулотлари ҳам олиб келинган. Кўмир омборларида жами 12,9 минг тонна кўмир заҳираси мавжуд.
Вазирлик штаби томонидан республика ҳудудларидаги электр, газ ва кўмир таъминоти корхоналари томонидан куз-қиш мавсумига тайёргарлик ишларининг ҳолатини танқидий ўрганиш ва муаммоларни жойида бартараф этиш ишлари давом эттирилмоқда.
Ўзбекистон Республикаси
Энергетика вазирлиги Матбуот хизмати
975
