Бугун 5 ноябрь куни Фарғона нефтни қайта ишлаш заводида «Евро 4» ва «Евро 5» маркали дизел ёқилғисини ишлаб чиқаришга старт бериш тадбири бўлиб ўтди.
Тадбирда Энергетика вазири ўринбосари Беҳзот Нарматов, Фарғона вилояти ҳокими Хайрулла Бозоров, Jizzakh Petroleum бош директори Шокир Файзуллаев, ФНҚИЗ директори Хабиб Латипов ва оммавий ахборот воситалари вакиллари иштирок этди.
Ўзбекистон Республикаси Вазирлар Маҳкамасининг 2010 йил 2 июндаги 67-сонли қарори доирасида “Фарғона нефтни қайта ишлаш заводини модернизация қилиш” инвестиция лойиҳасини босқичма-босқич амалга ошириш ишлари олиб борилмоқда.
Лойиҳасига кўра, 2020-2023 йилларда ФНҚИЗда гидрокрекинг ва изомеризация (ёқилғи ва мой маҳсулотлари олиш усули) жараёларини босқичма-босқич жорий этиш ҳамда «Евро-5» стандарти талабига жавоб берадиган автомобил бензинлари ва дизел ёқилғиларини ишлаб чиқаришни йўлга қўйиш кўзда тутилган.
Айни пайтда мазкур заводнинг ГДС қурилмаси (дизел ёқилғисини гидротозалаш)даги 1,3 миллион АҚШ доллар қийматли катализатор алмаштириш йўли билан биринчи босқич ишлари амалга оширилиб «Евро 4» ва «Евро 5» маркали дизел ёқилғисини ишлаб чиқариш йўлга қўйилди.
«Евро 4» ва «Евро 5» дизел ёқилғиси — ёқилғининг ёниш жараёнини такомиллаштириш ва унинг сарфини камайтириш, шовқин, тебраниш ва коррозия тезлигини пасайтириш, двигателни ишга туширишни осонлаштириш каби афзалликларга эга.
Лойиҳа доирасида ГДС қурилмасининг мавжуд катализаторини замонавий ва юқори самарадор бўлган катализаторларга алмаштириш мақсадида Франциянинг Axens компанияси билан катализатор ишлаб чиқариш ва етказиб бериш бўйича шартнома имзоланди. Қурилма “Тойо инжиниринг корпорейшн” (Япония) томонидан қурилган бўлиб, унинг лойиҳавий қуввати йилига 1 700 000 тоннани ташкил этади.
Ўзгаришлар ўз навбатида заводда ишлаб чиқарилаётган Евро 2 дизел ёқилғиси сифатини келгусида Евро 4 ва Евро 5 стандартлари талаблари даражасига ошириб, олтингугурт чиқиндиларини камайтиришга, экспорт имкониятларини кенгайтиришга ва толлинг операцияларининг жозибадорлигини оширишга хизмат қилади.
Бундан ташқари, Фарғона НҚИЗ илгари ишлаб чиқарилмаган ва чет элдан сотиб олинадиган қишки дизел ёқилғисини ишлаб чиқаришни бошлайди. Шундай қилиб, завод мутахассислари лаборатория тадқиқотлари, саноат синовлари хамда янги ДТЗ-2 маркасидаги паст қотиш хароратига эга қишки мавсум учун мўлжалланган дизел ёқилғисини ишлаб чиқаришни йўлга қўйиш бўйича бутун циклни амалга оширдилар.
Натижада, -25 ° C дан юқори бўлмаган қотиш хароратига эга ва филтрланишнинг максимал ҳарорати -18 ° C дан юқори бўлмаган қишки дизел ёқилғиси нефт маҳсулотларини сотиш биржасида оммавий истеъмолчига тақдим этилади.
Таъкидлаш лозимки, паст даражадаги қотиш хусусиятларидан ташқари, ушбу дизел ёқилғиси юқори эксплуатацион хусусиятларга эга бўлиб, бу эса ўз навбатида двигателнинг юқори қувват ва самарадорлигини оширишни, ёқилғи линияси орқали осон ўтказилишини ва совуқ стартни енгиллаштиришни таъминлайди.
Нефт маҳсулотларининг янги, талабга жавоб берадиган, юқори сифатли ва экологик тоза турларини ишлаб чиқариш бўйича ишлар давом эттирилмоқда.
Энергетика вазирлиги Матбуот хизмати
1567
