АЭС ни қуриш ва уни эксплуатация қилиш бўйича тажрибани ўрганиш, шунингдек, мамлакатлар ўртасида атом энергиясидан тинчлик мақсадида фойдаланиш бўйича музокаралар олиб бориш ва ушбу соҳада ҳамкорликни йўлга қўйиш учун Ўзбекистон Республикаси делегацияси Францияга ташриф буюрди.
Делегация Энергетика вазирлиги, Давлат саноат хавфсизлиги қўмитаси, “Ўзатом” агентлиги ва АЭС қурилиши бўйича дирекция вакилларидан ташкил топган.
Ташриф доирасида делегация Валанс шаҳридаги «Orano Tricastin» ва «Framatome Romans» компанияларининг ишлаб чиқариш майдончаларида бўлди. Шунингдек, ўзбекистонлик мутахассислар Трикастин майдончасидаги корхоналар фаолияти билан, шу жумладан, ишларнинг ҳар бир босқичи ва уранни бойитиш бўйича ишлаб чиқариш цикли билан танишди.
Айни чоғда Ўзбекистон делегациясининг Францияга ташрифи давом этмоқда. Мамлакат давлат органлари вакиллари билан учрашувлар, шунингдек, фойдаланилаётган ва қурилаётган АЭС ларни бориб кўриш режалаштирилган.
Маълумот учун: Трикастин майдончаси ишлаб чиқариш майдончаси бўлиб, у ўз ичига ядровий ёқилғи циклига оид объектларни ва атом электр станциясини қамраб олади. У Рон водийсининг қуйи қисмида Трикастин тарихий ҳудудининг марказида жойлашган. Унинг майдони 600 гектарни ташкил этади. Ушбу майдончада жойлашган «Orano Tricastin» платформаси ўз ичига фаолиятнинг барча турлари ва босқичларини (конверсия, дефторирлаш ва денитрация) ва уранни бойитиш ишларини қамраб олади. Компания уран конларини излашдан тортиб уни қайта ишлашгача бўлган ишлар комплексини амалга оширади.
Ўзбекистон Республикаси
Энергетика вазирлиги матбуот хизмати
868
