Энергетика вазирлиги Штаби аъзолари Навоий вилояти истеъмолчиларини 2020-2021 йиллар куз-қиш мавсумида табиий ва суюлтирилган газ, электр энергияси, кўмир ҳамда брикет маҳсулотлари билан таъминлаш борасида амалга оширилаётган ишлар билан яқиндан танишиш мақсадида Навоий вилоятига ташриф буюрди.
Ишчи гуруҳ вилоятимизнинг Хатирчи туманида бўлиб, истеъмолчиларни куз-қиш мавсумида энергия ресурслари билан таъминлаш ҳолати билан танишди. Дастлаб, Халқ депутатлари Хатирчи тумани Кенгашининг навбатдаги ўн саккизинчи сессияси бўлиб ўтди. Сессияда Ўзбекистон Республикаси Энергетика вазирлиги махсус штаби бошлиғи ўринбосари Акмал Эшонқулов куз-қиш мавсумида истеъмолчиларни энергия ресурслари билан таъминланиши бўйича олиб борилаётган ишлар, мавжуд муаммолар ва уларнинг ечимлари тўғрисида гапирди. Тадбир доирасида Сессия иштирокчиларининг куз мавзуси юзасидан берган саволларига масъуллар томонидан атрофлича жавоб берилди.
Маълумот учун: 2020-2021 йиллар куз-қиш мавсумига тайёргарлик ишлари давомида аҳолини бир маромда табиий газ билан таъминлаш учун Навоий вилоятидаги жами 3,50 км, шундан Хатирчи туманида 0,2 км газ қувурлари реконструкция қилинган, газ қувурларининг 0,4 км қисми, яъни Хатирчи тумани “Парахун” маҳалласидаги 0,4 км газ қувурлари мукаммал, 2 та газ тақсимлаш пункти капитал таъмирланган. 500 дан ортиқ газ тақсимлаш қурилмалари тафтиш қилинган. 4,5 км газ қувурларида босим остида зичликка синаш ва ҳаво босими ёрдамида тозалаш ишлари олиб борилган. 6 км дан ортиқ ер ости газ қувурлари эса прибор усули билан текширилган.
Шунингдек, вилоят истеъмолчиларига 2020-2021 йил куз-қиш мавсуми даврида етказиладиган суюлтирилган газ режаси ишлаб чиқилган. Унга кўра, истеъмолчиларга 2020 йилнинг тўртинчи чораги давомида жами 7859 тонна, 2021 йилнинг биринчи чораги давомида эса 3824 тонна суюлтирилган газ етказиш белгиланган.
Ишчи гуруҳи томонидан Хатирчи туманининг олис ҳудудида жойлашган “Олтинсой” маҳалласи “Чилаш” қишлоғи аҳолисини электр энергияси ва суюлтирилган газ билан таъминлаш ишлари ҳолати ўрганилди. Мавжуд муаммоларни қисқа муддатларда ҳал этиш бўйича масъулларга зарур топшириқлар берилди.
Шундан сўнг “Сарой” маҳалла фуқаролар йиғинига ташриф буюрилиб, ҳудуддаги икки нафар эҳтиёжманд оилага замонавий газ плитаси, суюлтирилган газ ҳамда кўмир маҳсулотлари тарқатилди.
“Hududgaz Navoiy” газ таъминоти филиали матбуот хизмати
1070
