Ҳурматли истеъмолчилар!
Жорий йилнинг 6 декабрь куни истеъмолчиларни ёқилғи-энергетика ресурслари билан таъминлаш бўйича амалга оширилган ишлар юзасидан маълумот бериб ўтамиз.
Хусусан, 6 декабрь куни иссиқлик электр станциялари ва гидро электр станциялари орқали 219 миллион 500 минг киловатт-соат электр энергияси ишлаб чиқарилди. Шундан республика истеъмолчиларига 210 миллион 700 минг киловатт-соат электр энергияси етказиб берилди.
Шунингек, 6 декабрь куни ҳудудий газ таъминоти корхоналари томонидан истеъмолчиларга жами 94 миллион 696 минг куб метр табиий газ етказиб бериш режалаштирилган бўлса, амалда 105 миллион 322 минг куб метр табиий газ етказиб берилди. Шунингдек, республика истеъмолчиларига жами 435 тонна суюлтирилган газ етказиб берилди.
Истеъмолчиларни кўмир ва брикет маҳсулотлари билан таъминлаш мақсадида 6 декабрь куни “Ўзбеккўмир” акциядорлик жамияти томонидан 14 минг 893 тонна маҳаллий кўмир маҳсулотлари етказиб берилди.
Иссиқлик электр станцияларидаги барча энергоблоклар ўз номинал қувватида ишламоқда. Иш режими бўйича эътирозлар мавжуд эмас.
Корхоналарда қазиб чиқариш ва ишлаб чиқариш ишлари режалаштирилган режимда олиб борилмоқда. Барча корхоналарда 24 соатлик навбатчилик ташкил қилинган.
Энергетика вазирлигининг навбатчилик қисмига электр энергияси таъминоти бўйича истеъмолчилар томонидан Андижон, Бухоро, Қашқадарё, Самарқанд, Сурхондарё, Тошкент ва Фарғона вилотидан мурожаатлар келиб тушди. Мурожаатлар ҳудудлардаги масъул мутахассисларга етказилиб, муаммо тегишли хизматларни тезкор жалб этган ҳолда ижобий ҳал этилди.
Самарқанд вилоятида Зарафшон маҳалла фуқаролар йиғинида 120 та ва Қизилбош маҳалла фуқаролар йиғинида 60 та аҳоли истеъмолчиларининг электр таъминотида узилиш бўлган. Жойлардаги авариявий бригадалар томонидан камчиликлар бартараф этилиб, истеъмолчилар электр тармоқларига уланган. Ҳудудлардаги масъул мутахассислар томонидан 24 соатлик навбатчилик ташкил қилинган ва бу орқали барча иш жараёнлари назоратга олинган.
Вазирлик навбатчилик қисмига сутка давомида табиий газ таъминоти бўйича фуқаролардан мурожаатлар келиб тушмади. Табиий газ етказиб бериш бўйича ишлар режага асосан амалга оширилмоқда. Шу билан бирга, суюлтирилган газ таъминоти тизимидаги барча ишлар режалаштирилган график бўйича амалга оширилмоқда.
Шу ўринда истеъмолчилардан иситиш мосламаларига эҳтиёткорлик билан муносабатда бўлишингиз, газ ускуналаридан фойдаланишда хавфсизлик қоидаларига қаттиқ риоя қилишингизни сўраймиз.
Эслатиб ўтамиз, электр энергияси таъминоти билан боғлиқ масалалар бўйича 1154 ҳамда газ таъминоти масалалари бўйича 1104 қисқа телефон рақамларига мурожаат қилишингиз мумкин.
737
