Энергетика вазирлиги, Давлат саноат хавфсизлиги қўмитаси, «Ўзатом» агентлиги ва АЭС қурилиши бўйича дирекция вакилларидан ташкил топган Ўзбекистон делегацияси атом электр станцияларини қуриш ва уларни эксплуатация қилиш бўйича француз тажрибасини ўрганиш мақсадида 2019 йилнинг 10-15 сентябрь кунлари Францияда хизмат сафарида бўлди.
Делегация аъзолари бориб кўрган объектлардан бири Белфорд шаҳридаги "General Electricк" компаниясининг «Алстом» заводи билан танишди. Бу ерда делегация замонавий атом буғ турбиналари, генераторлар ҳамда атом электр станциялари, буғ-газ ускуналари ва бошқа генерация объектлари учун мўлжалланган ускуналарни ишлаб чиқариш жараёнини ўрганди.
Шу билан бирга, делегация аъзолари "Orano" компаниясини бориб кўрди. Унинг ишлаб чиқариш майдонлари ўз ичига ядровий ёқилғи циклига мансуб объектларни қамраб олади. Компания ядровий ёқилғидан фойдаланишнинг барча босқичлари — уран конларни тадқиқ қилишдан, уни қайта ишлаш ва бойитишгача бўлган жараён билан шуғулланади.
Шунингдек, "FramatomeRomans" компаниясини фаолияти билан ҳам танишув бўлиб ўтди. Бу ерда уран таблеткалари, ёқилғи стерженлари ва иссиқлик ажратувчи ускуналар ишлаб чиқарилади ва ушбу маҳсулотларнинг асосий қисми экспорт қилинади.
Сафар доирасида «СЕА» атом энергетикаси тадқиқотлар марказида Ўзбекистон делегацияси томонидан Франциянинг атом энергетикаси соҳасидаги давлат тузилмалари вакиллари билан музокаралар ўтказилди.
Франциянинг тегишли вазирликлари ва идоралари, саноат компаниялари билан ўтказилган музокаралар давомида атом энергиясидан тинчлик мақсадида фойдаланиш соҳасида ҳамкорликни йўлга қўйиш борасида сўз борди. Унда бўлажак ўзаро ҳамкорлик, тажриба алмашиш ва кадрлар тайёрлаш бўйича аниқ чора-тадбирлар белгиланди.
Шунингдек делегация Фламанвиль шаҳридаги АЭС майдончаси билан танишди. У ерда 2 та блок фаолият юритади ва EPR технологияси бўйича 3+ авлодга мансуб янги блок қурилиши якунланади.
Шуни қўшимча қилиш мумкинки, Франциянинг атом энергетикаси соҳасида 58 энергоблок, 19 атом электр станцияси фаолият юритади ва улар 2018 йилда электр энергия ишлаб чиқаришнинг 72 фоизини таъминлади. Франциянинг атом энергетикаси 220 минг иш ўринларини таъминлайди, соҳадан бюджетга тўғридан-тўғри тушумлар йилига 1,3 млрд. еврони ташкил этади.
Ўзбекистон Республикаси
Энергетика вазирлиги Матбуот хизмати
1232
