Аввал хабар қилганимиздек, бир гуруҳ маҳаллий ва халқаро мутахассислар ҳамда журналистлар Самарқанд шаҳрида бўлиб, бу ерда электр энергиясини ҳисобга олиш ва назорат қилишнинг автоматлаштирилган тизимини татбиқ этиш бўйича амалга оширилаётган ишлар билан танишмоқда.
"Ҳудудий электр тармоқлари" акциядорлик жамияти ва Осиё тараққиёт банки томонидан ташкил этилган тадбирда Марказий осиё минтақавий-иқтисодий ҳамкорлиги (МОМИҲ)га аъзо давлатлар вакиллари иштирок этмоқда.
Президентимизнинг 2018 йил 23 октябрда “Электр энергетикаси тармоғини жадал ривожлантириш ва молиявий барқарорлигини таъминлаш чора-тадбирлари тўғрисида”ги қарори ижросини таъминлаш мақсадида “Ҳудудий электр тармоқлари” акциядорлик жамияти томонидан мамлакатимизда босқичма-босқич электр энергиясини ҳисобга олиш ва назорат қилишнинг автоматлаштирилган тизими (АСКУЭ)ни жорий этмоқда. Пресс-тур доирасида иштирокчилари Самарқандда айни шу жараённи ўрганишга муваффақ бўлмоқда.
Таъкидлаш керакки, юртимиздаги 45 шаҳар ва туманда 1,5 миллиондан зиёд электр ҳисоблагич ўрнатилди. Жорий йил охирига қадар 2,5 миллиондан, 2020 йил якунига бориб, 7 миллиондан зиёд истеъмолчинининг барчасига замонавий электр ҳисоблагичлар ўрнатиш ишларини якунлаш кўзда тутилган.
Жумладан, Бухоро, Жиззах ва Самарқанд вилоятларида ҳам истеъмолчиларига Жанубий Кореянинг “KT Corporation” компанияси билан ҳамкорликда замонавий ҳисоблагичларни ўрнатиш ишлари амалга оширилмоқда.
– Самарқанд вилоятида жами 817 862 та электр энергияси истеъмолчилари мавжуд, – деди Самарқанд ҳудудий электр тармоқлари корхонасининг АСКУЭ бўлими бошлиғи Валижон Қиличев. – Улардан 778 247 таси аҳоли, 39 615 таси улгуржи истеъмолчилардир.
2019 йилнинг 10 сентябрь ҳолатига жами 267 мингга яқин истеъмолчиларга АСКУЭ тизимига мос бўлган электр ҳисоблагичлар ўрнатилди. Шулардан 152 300 таси тизимга боғланиб, электр энергияси истеъмоли, ҳисоб-китоблар, назорат ишлари автоматлаштирилган тарзда олиб борилмоқда. Вилоят бўйича электр ҳисоблагич ўрнатиш ишларига жами 234 нафар ходим жалб қилингани жараённингиянада тез ва сифатли бўлишига имкон яратмоқда. Бугун эса журналистларга тизимнинг афзаллиги хақида тақдимотлар ўтказяпмиз. Бундан мақсад эса халқаро мутахассислар билан олиб бораётган ишларимизни кенг жамоатчиликка етказишдир.
– Мен юртингизга иккинчи бор келишим, – деди озарбайжонлик журналист Хаяла Мамедова. – Бу галги хизмат сафарим қизиқарли бўлмоқда. Айниқса, тарихий Самарқанд мени ўзига мафтун этмоқда. "Ақлли" хисоблагичларга келсак, бизда ҳам шунга ўхшаш тизим ўрнатилган. Аммо бу бироз фарқли экан. Ўзбек ва Жанубий кореялик мутахассислардан бу тизим ҳақида кўп маълумотлар олдик. Аммо биз уларга янада кўп саволлар бераяпмиз. Бу пресс-турнинг қизиқарли бўлишига имконият яратмоқда.
Пресс-тур ўз ишини давом эттирмоқда.
1192
