“Ўзэнергоинспекция” Фарғона ҳудудий бўлими томонидан энергия ресурсларидан оқилона ва самарали фойдаланиш, замонавий энергия тежовчи технологияларни амалда тадбиқ этиш, электр энергияси сарфини оптималлаштириш ҳамда электр энергиясини иқтисод қилиш бўйича семинар-тренинг ташкил этилди.
Ушбу семинар-тренингда “Ўзэнергоинспекция” бошлиғининг ўринбосари ва бошқарма бошлиқлари, Фарғона вилояти ҳокимининг ўринбосари, шунингдек, жами 60 нафардан зиёд вилоятдаги йирик саноат корхоналари, бошқа корхона ва ташкилотлар, ижтимоий соҳа муассасалари бошқарма вакиллари иштирок этишди.
Семинар-тренингда дастлаб Президентимиз томонидан қабул қилинган бир қатор қарорларга асосан вилоятдаги иқтисодиёт тармоқлари ва ижтимоий соҳаларида сўнги йилларда энергия сиғимини қисқартириш бўйича режалаштирилган ва амалга оширилган ишлар юзасидан таҳлилий маълумотлар тақдим этилди.
Шундан сўнг, семинар-тренинг иштирокчиларига ҳудудий бўлим ходимлари томонидан муқобил энергия манбаи ҳисобланган қуёш панелларини ижтимоий соҳаларда 2020 йилда ўрнатлиши бўйича, шунингдек, оддий ҳаракатлар билан беҳуда сарфланаётган электр энергиясини тежаш усуллари тўғрисида батафсил маълумотлар тақдим этилди. Жумладан, тушлик вақтларида фойдаланилмай ишлаб турган, лекин тармоқдан электр энергиясини истеъмол қилаётган копьютер жиҳозларини 1 соатга ўчириш орқали қанча электр энергияси ва маблағлар тежаб қолиниши мумкинлиги, шунингдек, ушбу маблағларни қуёш коллекторларни сотиб олиш учун йўналтириладиган бўлса, янада кўпроқ энергия ресурсларини тежаш мумкинлиги ҳақида ҳисоб-китоблар асосида фотослайдлар намойиш этилди.
Бундан ташқари, иштирокчиларга ёқилғи энергетика ресурсларидан унумли фойдаланилишини йўлга қўйиш мақсадида амалда кучга кирган қарорлар тўғрисида, уларни ижросини амалга ошириш учун қандай ишлар амалга оширилиши лозимлиги ва уларни бажариш тартиблари, бунга масъул бўлган ходимлар ва бошқалар ҳақида тегишли тушунчалар берилди.
Шуни айтиш жоизки, агарда барча истеъмолчилар томонидан “Электр энергияси учун тўлов амалга оширганман ва шу сабабли ҳоҳлаганимча фойдаланаман” деган тушунчалар четга сурилиб, улар томонидан энергия ресурсларидан, шу жумладан электр энергиясидан оқилона, самарали ва унумли фойдаланиладиган бўлса, ҳозирда ягона энергетика тизимида кузатилаётган қувват ва энергия танқислиги ҳолатларини камайишига ўз ҳиссаларини қўшган бўлар эдилар.
Семинар-тренинг якунида “Ўзэнергоинспекция” Фарғона ҳудудий бўлими томонидан Ўзбекистон Республикаси Вазирлар Маҳкамасининг 2020 йил 11 ноябрдаги 712-сон қарори билан тасдиқланган ва амалга кучга киритилган янги таҳрирдаги “Истеъмолчилар электр қурилмаларини техник эксплуатация қилиш Қоидалари” ва “Истеъмолчилар электр қурилмаларини эксплуатация қилишда хавфсизлик техникаси Қоидалари” китоблари, шунингдек, бўлим томонидан ишлаб чиқилган мазкур семинар мавзусига оид бўлган ва хавфсизликни таъминлашга қаратилган 6 хил турдаги 400 та тарқатма материаллар барча иштирокчиларга бепул тарқатилди.
“Ўзэнергоинспекция” Матбуот хизмати
798
