Жорий йилнинг 18 октябрь куни Ўзбекистон Республикаси Энергетика вазирининг биринчи ўринбосари Азим Ахмедхаджаев ва “Қишлоқ қурилиш банк” АТБ бошқаруви раиси Алишер Муратов ўртасида учрашув бўлиб ўтди.
Учрашув давомида Энергетика вазирлиги ҳузуридаги бюджетдан ташқари Тармоқлараро энергияни тежаш жамғармаси ва “Қишлоқ қурилиш банк” АТБ ўртасида қуёш фотоэлектрик станциялари, қуёш сув иситкичлари, маиший энергия самарадор газ-горелкали қурилмалар ва қозонларни сотиб олиш учун аҳолига истеъмол кредитлари ажратиш учун жамғарманинг кредит линиясини очишни назарда тутувчи Бош келишув имзоланди.
Ушбу мақсадлар учун кредитлар банк томонидан Жамғарма маблағларидан беш йилгача муддатга ва кредит шартномаси тузилган кундаги Марказий банк томонидан белгиланган асосий ставка бўйича ажратилади.
Таъкидлаш жоизки, Энергетика вазирлигининг бевосита кўмагида Жамғарма томонидан энергия самарадорлигини ошириш, жумладан, энергия самарадор технологиялар ва қайта тикланувчи энергия манбалари қурилмаларини жорий этган ҳолда биноларнинг иссиқлик муҳофазасини яхшилаш бўйича лойиҳаларни молиялаштириш мақсадида банклар учун кредит линияларини очиш хам режалаштирилмоқда.
Ўзбекистон Республикаси
Энергетика вазирлиги Матбуот хизмати
1409
