Жорий йилнинг 14 февраль куни “EXPO-2020” бутунжаҳон кўргазмасида (Дубай, БАА) Ўзбекистон энергетика ҳафталиги доирасида “Uzbekistan GTL” заводи ва “Clariant” компанияси ўртасида ўзаро англашув меморандуми имзоланди.
“Кимё соҳасида экологик барқарор ва инновацион ечимларга ихтисослашган “Clariant” компанияси Ўзбекистондаги саноат корхоналари билан ишлашда катта тажрибага эга эканлиги, шунингдек, республика саноати жадал суръатлар билан ривожланишини ҳисобга олган ҳолда Энергетика вазирлиги, “Ўзбекнефтгаз” АЖ, хусусан, “Uzbekistan GTL” заводи билан узоқ муддатли ва ўзаро манфаатли ҳамкорликни йўлга қўйишдан манфаатдор”, - деди “EXPO-2020” бутунжаҳон кўргазмасида Ўзбекистон энергетика ҳафталиги доирасида ўтказилган “Ўзбекнефтгаз” АЖ ва “Uzbekistan GTL” заводи вакиллари билан учрашувда “Clariant” нинг Мюнхендаги ваколатхонасининг директори доктор Ралф Вайспаупт.
“Clariant” компанияси вакиллари Ўзбекистонда ёқилғи-енергетика ва саноат тармоқларида амалга оширилаётган ислоҳотларни катта қизиқиш билан кузатаётганликларини, бугунги кунда республикамизнинг улкан салоҳиятидан келиб чиқиб, Ўзбекистонда кимёвий реагентлар ва катализаторларни ишлаб чиқаришни ташкил этиш имкониятларини пухта ўрганаётганликларини таъкидладилар.
Имзоланган Меморандум доирасида GTL заводига зарур кимёвий маҳсулотларни етказиб бериш соҳасидаги ҳамкорликнинг жиҳатлари белгилаб олинди.
“Clariant” ихтисослаштирилган кимёвий маҳсулотларни ишлаб чиқариш бўйича дунёдаги етакчи компаниялардан биридир. У бешта қитъада 100 дан ортиқ гуруҳ компаниялари томонидан фаолоят кўрсатиб, дунё бўйлаб 13 000 га яқин ходимларга эга. Бош офиси Швейцариянинг Муттензе шаҳрида жойлашган.
“Ўзбекнефтгаз” АЖ Матбуот хизмати
796
