2022 йилнинг 15 февраль куни “Экспо 2020” халқаро кўргазмасида (Дубай, БАА) Ўзбекистон энергетика ҳафталиги доирасида “Uzbekistan GTL” компанияси вакиллари ExxonMobil (АҚШ) делегацияси билан бизнес-учрашув ўтказди.
“ExxonMobil” жаҳон энергетика бозорининг ортиб бораётган талабини қондириш учун технологик ютуқлар ва инновацияларни қўллайдиган дунёдаги энг йирик нефт компанияларидан бири ҳисобланади. Компания саноатдаги энг йирик ишлаб чиқариш ресурсларига эга ва нефт маҳсулотлари ва нефт-кимё маҳсулотларини қайта ишлаш, ишлаб чиқариш ва маркетинги бўйича дунёнинг энг йирик компанияларидан биридир.
Учрашувда GTL заводида ишлаб чиқариладиган ва нефт кимё саноати учун қимматли хомашё ҳисобланган синтетик нефтдан АPI таснифи (Америка нефт институти) III+ гуруҳидаги синтетик мойлар ишлаб чиқаришни ташкил этиш имкониятлари муҳокама қилинди. Бугунги кунда синтетик мойлар эксплуатацион ҳусусиятлари бўйича минерал мойларга нисбатан сезиларли устунликка эга ва шунинг учун уларга талаб ҳар йили ортиб бормоқда.
“ExxonMobil” вакиллари мазкур лойиҳани амалга ошириш жараёнини биргаликда батафсил ўрганишдан манфаатдор эканликларини билдирдилар, ва бу борадаги кейинги қадамлар белгиланиб, ҳамкорликнинг истиқболли йўналишлари кўриб чиқилди.
Аввалроқ Ўзбекистон Президенти Шавкат Мирзиёев “Uzbekistan GTL” синтетик суюқ ёқилғи ишлаб чиқариш мажмуасининг очилиш маросимида ташкил этилаётган ягона нефт-кимё кластери доирасида завод атрофида янги сателит ишлаб чиқаришларни ташкил этиш бўйича топшириқ берган эди. Очилиш маросимида Ўзбекистон Президентига “Uzbekistan GTL” заводи негизида синтетик мойлар ишлаб чиқаришни ташкил этиш бўйича истиқболли лойиҳа тақдим этилди.
Дастлабки маълумотларга кўра, Ўзбекистондаги GTL заводи негизида 100 минг тоннагача синтетик мойлар ишлаб чиқаришни ташкил этиш имконияти мавжуд бўлиб, бу келажакда республикада юқори сифатли мотор мойларини тўлақонли ишлаб чиқаришни яратиш имконини беради.
1024
