Ўзбекистон Республикаси Энергетика вазирлиги ва “Иссиқлик электр станциялари” АЖ электр энергияси ишлаб чиқариш корхоналарини замонавий билим ва кўникмаларга эга кадрлар билан таъминлаш, мутахассислар малакасини узлуксиз оширишга алоҳида аҳамият бермоқда.
Бунга кўра, жорий йилда тизимда фаолият юритаётган жами 10 076 нафар ходимдан 4517 нафарининг, шу жумладан, 3984 нафар ишлаб чиқариш ходимлари, 323 нафар мутахассис ва 210 нафар раҳбар кадрларнинг малакасини ошириш режалаштирилган. Мазкур йўналишда олиб борилган чора-тадбирлар натижасига кўра 1-чорак мобайнида 380 нафар ходимнинг малакаси оширилди.
Иссиқлик ва электр энергияси ишлаб чиқариш жараёнига замонавий стандартларни кенг жалб қилишда халқаро тажрибани ўрганиш ҳам муҳим. Шу мақсадда “Иссиқлик электр станциялари” АЖ Россия Федерацияси Энергетика вазирлиги тасарруфидаги Санкт-Петербург энергетика малака ошириш институти билан ҳамкорликни йўлга қўйди. Ўқув дастурига кўра, айни пайтгача 35 нафар ишлаб чиқариш ходимлари Санкт-Петербург шаҳрида ўз малакаларини ошириб қайтишди.
Шунингдек, замонавий “экологик самарадор” энергоқурилмаларга техник хизмат кўрсатиш йўналишида Италиянинг “AC BOILERS S.p.A” компаниясининг тегишли муассасаларида 100 нафардан ортиқ ходимлар малакаси оширилиши ва ўзаро тажриба алмашиш тадбирлари режалаштирилмоқда.
- Халқаро таълим дастурларимиздан ташқари, мамлакатимиз ишлаб чиқариш корхоналари ва ўқув марказларида ҳам ходимларимиз малакасини ошириш режалаштирилган, - дейди “Иссиқлик электр станциялари” АЖ ходимлар билан ишлаш бўлими бошлиғи Феруза Турғунова. - Йил давомида “Навоий ИЭС” акциядорлик жамиятининг “Келажак энергетикаси” ўқув марказида 207 нафар, “Ўзбекгидроэнерго” компанияси таълим марказларида эса 150 нафар ходимнинг малакасини ошириш кўзда тутилмоқда.
Эътиборли жиҳати, Президентимиз томонидан олий таълим муассасалари талабалари бандлигини таъминлаш юзасидан белгилаб берилган устивор вазифалар ижросини таъминлаш бўйича “Иссиқлик электр станциялари” АЖ томонидан тизимли ишлар амалга оширилмоқда. Хусусан, электр энергетикаси йўналиши бўйича мутахассисларни тайёрлашга ихтисослашган мамлакатимизнинг 4 та олий таълим муассасалари 35 нафар юқори босқич талабалари ўтказилган танлов натижаларига кўра шартномалар асосида электр станцияларида ҳақ тўланадиган амалиётга жалб қилинди.
Амалиётни муваффақиятли ўтаган ёшлар электр станцияларида доимий иш билан таъминланадилар.
“Иссиқлик электр станциялари” АЖ Матбуот хизмати.
877
