“Hududgazta’minot” AJ tomonidan iste’molchilar uchun yana bir qulaylik yaratildi! Endi har bir iste’molchi hududgaz.uz saytida joriy etilgan “Xonadonlar uchun gaz harajati kalkulyatori”dan foydalanib, iste’mol qilingan tabiiy gaz uchun amaldagi va taklif etilayotgan tariflar bo‘yicha qiyosiy hisob-kitoblarni amalga oshirishi mumkin. Ushbu qulaylik yangi joriy etilgan “Iste’molchi” tizimiga ham tadbiq qilinishi ko‘zda tutilgan.
Gaz ta’minoti tizimida iste’molchilar uchun yaratilayotgan qulayliklar, ayniqsa, “aqlli” hisoblagichlarning o‘rnatilishi tabiiy gaz sarfi va to‘lovlarni masofadan turib nazorat qilish, soha xodimlari va iste’molchi o‘rtasida yuzaga keladigan turli tushunmovchiliklarning oldini olishda muhim ahamiyat kasb etmoqda. Ayni vaqtgacha respublika bo‘yicha 3 milliondan ortiq zamonaviy hisobdon o‘rnatildi va bu jarayon yaqin vaqt ichida yakunlanadi.
Bundan tashqari “Hududgazta’minot” AJ iste’molchilar uchun xizmat ko‘rsatish turlarini doimiy ravishda rivojlantirib, kengaytirib bormoqda. Xususan, “Iste’molchi” tizimi tabiiy gaz foydalanuvchilarining shaxsiy hisob raqamini boshqarishi va onlayn xizmatlarni olish bo‘yicha yaqin ko‘makchi hisoblanadi. Ya’ni, shaxsiy kabinet aholiga yanada qulaylik yaratish maqsadida joriy qilingan bo‘lib, iste’molchilar ushbu kabinet orqali byurokratik to‘siqlarsiz, bir nechta gaz xizmatlaridan foydalanish imkoniyatiga ega.
Jumladan, shaxsiy kabinetdan foydalanish uchun birinchi navbatda iste’molchi ro‘yxatdan o‘tishi va kerakli ma’lumotlarni to‘ldirishi kerak. Yangi tizimning afzalligi shundaki, agar foydalanuvchida bir nechta shaxsiy hisob raqam bo‘lsa, ularning holatini, shuningdek, barcha ob’ektlari uchun gaz iste’moli va to‘lovlarni kuzatib borishi, kunlik, oylik gaz iste’moli hamda qarzdorlik haqidagi ma’lumotlarni olishi mumkin. Eng muhimi, uydan chiqmasdan yoki dunyoning istalgan nuqtasidan onlayn to‘lovning keng imkoniyatlaridan foydalangan holda, xizmatlar uchun to‘lov amalga oshirish imkoniyati mavjud.
Shaxsiy kabinet iste’molchi uchun quyidagi qo‘shimcha imkoniyatlarni beradi:
- Iste’molchilar tomonidan murojaatlar jo‘natish (gazga doir takliflar, e’tirozlar va boshqa masalalar yuzasidan);
- Gaz iste’moli, to‘lovlari va boshqa holatlarga oid barcha ma’lumotlarga ega bo‘lishi hamda o‘zi mustaqil monitoring qilishi;
- Iste’molchi bir nechta xonadoni bo‘yicha yagona oynada barcha ma’lumotlarini ko‘rish imkoniyati;
- Tabiiy gaz tarmog‘iga ulangan iste’molchi gaz servis xizmatlariga ariza berishi va boshqalar.
Ta’kidlash joizki, tizimdagi ma’lumotlar muntazam yangilanib turiladi. Oldingi bajarilgan amallar bo‘yicha barcha ma’lumotlar, jumladan, hisob raqamdagi mablag‘larni to‘lash va sarflash, shuningdek, gaz iste’moli haqidagi ma’lumotlar saqlanadi. Qulay tomoni, ma’lumotlarni sanalar bilan ko‘rish imkoniyati mavjud.
Iste’molchilardan gaz ta’minoti bo‘yicha o‘zlarini qiziqtirgan savollari bo‘lsa, shaxsiy kabinetlarida biriktirilgan hududiy gaz tashkilotiga murojaat etishlari yoki 1104 qisqa raqamiga qo‘ng‘iroq qilishlari mumkin.
17473
