Kecha, 29-avgust kuni Ozarbayjon Respublikasi Energetika vazirligi va O‘zbekiston Respublikasi Energetika vazirligi o‘rtasida energetika sohasida hamkorlikni kengaytirish bo‘yicha “Yo‘l xartasi” imzolandi.
Mazkur “Yo‘l xartasi” O‘zbekiston Respublikasi Energetika vazirining birinchi o‘rinbosari Azim Axmedxadjayev va Ozarbayjon Respublikasi Energetika vaziri Parviz Shahboz tomonidan imzolandi.
Unga asosan, 2022-2023-yillar davomida tomonlar mamlakatda qayta tiklanuvchi energiya manbalarini joriy etishda tegishli tanlovlarda ishtirok etishga taklif qilish, xususiy investitsiyalar hisobidan yangi issiqlik elektr stansiyalarini qurish sohasida bilim va ilg‘or tajriba almashish, o‘zaro investitsiyalarni rag‘batlantirish, energiya (elektr energiyasi va tabiiy gaz) bozorlarini liberallashtirish va yaratish, xususiylashtirishda tomonlarning ishtirokini taʼminlash va xususiy investitsiyalarni jalb etish chora-tadbirlari bo‘yicha tajriba va axborot almashishni amalga oshirishni nazarda tutadi.
Shuningdek, energiya resurslaridan samarali foydalanish sohasida hamkorlikni tashkil etish, investitsiyalarga xususiy sektorni jalb qilish, kadrlar tayyorlash, “O‘zbekneftgaz” AJ va “SOСAR” kompaniyasi kimyo va neft-gaz mahsulotlarini eksport/import qilish bo‘yicha qo‘shma tadbirlarni tashkil etish, “SOСAR” bilan Ozarbayjon hududida geologik qidiruv va uglevodorodlarni qazib olish loyihalarini birgalikda amalga oshirish imkoniyatlarini ishlab chiqish, “O‘zbekneftgaz” korxonalari xodimlarining ishlab chiqarish amaliyotini tashkil etish va tajriba almashish, DXSH tamoyillari asosida qayta tiklanuvchi energiya manbalari loyihalarini amalga oshirish bo‘yicha tajriba almashish kabilarni o‘z ichiga oladi.
Eslatib o‘tamiz, 2022-yilning 5-iyul kuni O‘zbekiston Respublikasi Energetika vazirligida Ozarbayjon Respublikasining “SOCAR” kompaniyasi delegatsiyasi aʼzolari bilan muzokaralar bo‘lib o‘tgan edi.
O‘zbekiston Respublikasi
Energetika vazirligi Matbuot xizmati
1064
