“Navoiy IESda quvvati 650 MVt boʻlgan uchinchi bugʻ-gaz qurilmasini qurish” investitsiya loyihasi doirasida “Navoiy IES” AJ va “Mitsubishi Power Ltd.” (Yaponiya) kompaniyasi oʻrtasida ushbu energoqurilmani qurish boʻyicha shartnoma imzolandi.
Investitsiya loyihasi Oʻzbekiston Respublikasi Prezidentining 2022-yil 28-dekabrda imzolangan “Oʻzbekiston Respublikasining 2023 – 2025-yillarga moʻljallangan investitsiya dasturini amalga oshirish chora-tadbirlari toʻgʻrisida”gi PQ-459-sonli qarorida belgilab berilgan ustuvor vazifalar ijrosini taʼminlash maqsadida amalga oshirilmoqda.
Shartnoma shartlariga koʻra, “Mitsubishi Power Ltd.” kompaniyasi tomonidan Navoiy viloyatining Karmana tumanida joylashgan “Navoiy IES” AJda quvvati 650 MVt boʻlgan zamonaviy va energosamarador bugʻ-gaz qurilmasini qurish ishlari olib boriladi.
Loyihani amalga oshirish muddati 2023 – 2026-yillar etib belgilangan. Investitsiya loyihasi Yaponiya xalqaro hamkorlik agentligi (JICA)ning moliyalashtirish manbalari hisobidan amalga oshiriladi.
Loyiha roʻyobi natijasida respublika energetika tizimida yiliga 4,8 mlrd kVt⋅soat qoʻshimcha elektr energiyasi ishlab chiqariladi. Unda zamonaviy hamda energosamarador qurilmalar joriy etilishi pirovardida yiliga 1 mlrd kub metr tabiiy gazni tejashi barobarida, 347 ta yangi ish oʻrni yaratilishini ham taʼminlaydi.
873
