Хабар қилганимиздек, Президентимизнинг 2018 йил 23 октябрда “Электр энергетикаси тармоғини жадал ривожлантириш ва молиявий барқарорлигини таъминлаш чора-тадбирлари тўғрисида”ги қарорига асосан, мамлакатимиз бўйлаб электр энергиясини ҳисобга олиш ва назорат қилишнинг автоматлаштирилган тизими (АСКУЭ)ни жорий этиш ишлари амалга оширилмоқда.
Хусусан, “Elektron xisoblagich” масъулияти чекланган жамияти билан ҳамкорликда Қашқадарё вилоятининг барча туман ва шаҳар истеъмолчиларига ҳам замонавий электр ҳисоблагичларни ўрнатиш ишлари бошланди. Маълумот учун, Қашқадарё вилоятида 644 мингдан ортиқ истеъмолчи бўлиб, ҳозирги кунда 73 мингдан зиёд ҳисоблагич ўрнатилди. 2020 йил якунига бориб бу кўрсаткични юз фоизга етказиш кўзда тутилган.
Эслатиб ўтамиз, ҳисоблагичлар истеъмолчиларга “Ҳудудий электр тармоқлари” АЖ маблағлари ҳисобидан бепул ўрнатилмоқда.
Ўрнатилаётган электр ҳисоблагичнинг ишлаши, ундан фойдаланиш қоидалари ва шунга ўхшаш бошқа кўпгина маълумотларни аҳолига етказиш учун махсус видеоролик ҳамда йўриқнома тайёрланди ва Telegram каналимиз (@minenergy_uz)га жойлаштирилди.
Айни вақтда ҳисоблагичлар ўрнатишда бирор бир англашмовчилик ёки таъмагирлик ҳолатлари кузатилаётган бўлса, 1154, (71)202-50-55 рақамларига ёки Telegram’даги “Hududiy elektr tarmoqlari” AJнинг администратори (@HET_admin)га ўз мурожаатларингизни йўллашингизни сўраймиз.
Ўзбекистон Республикаси
Энергетика вазирлиги Матбуот хизмати
1006
