Жорий йилнинг йил 21 февраль куни Энергетика вазирлигида Осиё тараққиёт банки маслаҳат кенгаши вакиллари билан учрашув бўлиб ўтди. Унда электр транспортини ривожлантириш истиқболи билан боғлиқ масалалар муҳокама этилди.
Осиё тараққиёт банки миссиясининг мақсади Ўзбекистонда электр транспортини ривожлантириш сиёсати ва стратегиясини ишлаб чиқиш бўйича маслаҳат бериш, электр транспорт воситаларининг атроф-муҳитга таъсирини таҳлил қилиш ҳамда солиқ, тарифлаш, субсидия ажратиш каби соҳаларда жаҳон амалиётини ҳисобга олган ҳолда иқтисодий оқибатларни баҳолашдир.
Учрашув давомида техник ёрдамнинг асосий йўналишлари, жамоат ҳамда шахсий транспорт воситалари соҳасига электр транспорт воситаларини босқичма-босқич жорий этиш, бу борада тегишли стандартларни амалга ошириш, зарур инфратузилмани ривожлантириш ва Ўзбекистонда қуёш манбаларининг катта имкониятларини ҳисобга олган ҳолда ёқилғи қуюиш станцияларининг турларини аниқлаш, ресурсларни тежаш зарурияти ва батареялар ишлаб чиқариш бўйича тавсиялар беришнинг асосий йўналишлари муҳокама этилди.
Қайд этиш керак, электр транспортини ривожлантириш масалалари Ўзбекистон Республикаси Президентининг 2019 йил 22 августдаги “Иқтисодиёт тармоқлари ва ижтимоий соҳанинг энергия самарадорлигини ошириш, энергия тежовчи технологияларни жорий этиш ва қайта тикланувчи энергия манбаларини ривожлантиришнинг тезкор чора-тадбирлари тўғрисида”ги қарори ижросини таъминлаш доирасида кўриб чиқилмоқда.
Ўзбекистон Республикаси
Энергетика вазирлиги Матбуот хизмати
1559
