Энергия ресурсларидан тўғри, тежамкор фойдаланишда кўп ҳолларда истеъмолчиларда тўлов маданияти етишмаслиги, ўғрилик, турли қинғир ишлар тўсиқ бўлмоқда. Шу каби иллатлар туфайли таъминотчи корхоналар томонидан ишлаб чиқарилаётгани билан истеъмолчига етказиб берилаётган энергия миқдорида тафовутлар юзага келмоқда. Бу эса дебитор қарздорликни суньий ошиб кетишига олиб келмоқда. Айрим одамлар давлатнинг, халқнинг бойлигини талон-тарож қилишда турли қинғир усуллардан фойдаланмоқда, десак янглишмаймиз.
Яқинда “Ўзэнергоинспекция”нинг Самарқанд ҳудудий бўлими ва Мажбурий ижро бюроси қўшма иш режасига асосан истеъмолчилар томонидан электр энергиясидан фойдаланиш қоидалари ўрганилганда ўғриликнинг антиқа усули аниқланди.
Жорий йилнинг 8 февраль куни Пахтачи туманида истеъмолчиларнинг электр энергиясидан фойдаланиши бўйича ўрганиш ўтказилди. Ўрганиш вақтида Пахтачи тумани Жахонобод маҳалласи ҳудудида жойлашган фуқаро Хусанов Хабибжоннинг хонадонида умумий қуввати 29,9 кВт бўлган электр қабул қилгичларни ишлатишда ҳисоблагичсиз ва тегишли рухсатсиз ўзбошимчалик билан электр энергиясидан фойдаланилаётганлиги аниқланди. Мажбурий ижро бюроси Пахтачи туман бўлими ходимлари томонидан шу куни истеъмолчига нисбатан MIB SA EH-0007681-сонли қоидабузарлик далолатномаси расмийлаштирилди. Истеъмолчи электр тармоғидан узиб қўйилди. Пахтачи туман электр таъминоти корхонаси томонидан қоидабузилиш оқибатида истеъмолчи томонидан электр таъминоти корхонаси манфаатлари жами 235 372,8 кВт*соат бўйича 105 917 760 сўм зарар келтирилганлиги маълум бўлди.
Шунингдек, “Ўзэнергоинспекция”нинг Самарқанд ҳудудий бўлими томонидан Самарқанд шаҳрида фаолият юритувчи “Каплан Сер Сам” МЧЖ шаклидаги қўшма корхонаси, “SAMARKAND ENGLAND EKO-MEDIKAL” МЧЖ шаклидаги қўшма корхонаси, “Ал-Муйин Барокат” МЧЖ ва “EAST OIL” МЧЖларга тегишли ишлаб чиқариш цехлари электр таъминоти учун ўрнатилган трансформаторларнинг умумий қуввати 750 кВА дан ортиқ бўлсада, Самарқанд шаҳар электр таъминоти корхонаси томонидан II таъриф гуруҳи бўйича ҳисоб-китоб амалга оширилаётганлиги аниқланди. Ҳозирда юқорида кўрсатилган истеъмолчилар томонидан истеъмол қилинган электр энергиясини I таъриф гурухи асосида қайта ҳисоб-китоб қилиш ишлари амалга оширилмоқда.
Бундан ташқари “SAMARQAND METAL PRODUCTION” МЧЖга тегишли ишлаб чиқариш цехи ўзбошимчалик билан қуввати 1000 кВА бўлган трансформатор пункти электр тармоғига улаб олинганлиги аниқланди. Мажбурий ижро бюроси Самарқанд шаҳар бўлими ходимлари томонидан қоидабузарлик далолатномаси расмийлаштирилиб истеъмолчи тармоқдан узилди. “Электр энергиясидан фойдаланиш қоидалари”нинг 117 банди талаблари асосида ҳозирда қоидабузарлик далолатномаси бўйича қайта ҳисоб-китоб ишлари амалга оширилмоқда.
Энергетика вазирлиги Матбуот хизмати
“Ўзэнергоинспекция” Матбуот хизмати билан ҳамкорликда
1549
