Аввал хабар берганимиздек, Тошкент вилоятининг Нурафшон шаҳрини кенгайтириш мақсадида кўп қаватли уйлар қурилиши ва саноат корхоналари сони ортаётгани табиий газга бўлган эҳтиёжнинг ҳам кўпайишидан дарак беради. Шу маънода Нурафшон шаҳри истеъмолчиларига табиий газ етказиб берувчи “Ўрта Сарой” Газ тақсимлаш станциясини (ГТС) модернизация қилиш заруриятга айланган эди.
“Ўзтрансгаз” акциядорлик жамияти томонидан ушбу ГТС янгидан қуриб битказилди. Янги тармоқнинг имконияти - шу пайтгача фойдаланиб келинган станциянинг қувватига нисбатан 2 баробарга ортди, шунингдек, шаҳарнинг ҳозирги кундаги соатига 53 минг куб метрлик талабидан ҳам ортиқ ҳажмда хизмат кўрсатишга етарли.
Станцияга кириш йўли, электр тармоғи учун бетон таянч устунлари ва трансформатор қурилиб тармоқ барпо этилди. Эътиборли жиҳатлардан яна бири, энди станция аҳоли пунктидан анча узоқроқда жойлашди, хавфсизлик даражаси ҳам ортди.
Мазкур ГТСни фойдаланишга топширишдан аввал буюртмачи “Ўзтрансгаз” АЖ раҳбари У.Сайидов ва бошқа масъул ходимлар ГТСга бориб станциядаги технологик ускуналар, қурилишда техник талабларга қай даражада риоя қилингани ва
яратилган шарт-шароитларни диққат билан кўздан кечиришди. Тегишли фикр-мулоҳазалар билдирилди.
Станциядаги Операторлар уйи замонавий лойиҳа асосида энергия тежамкор қурилиш материаллардан фойдаланиб бунёд этилди. Ишхона, дам олиш хонаси, ошхона ва санитария бўлимларига эга бўлган Операторлар уйи зарур маиший техника воситалари билан ҳам жиҳозланган бўлиб, яшаб ишлаш учун барча шароитларга эга.
Нурафшонлик истеъмолчиларга топширилган бу объект “Ўзтрансгаз”нинг навбатдаги туҳфаси бўлиб хизмат қилади.
“Ўзтрансгаз” АЖ Матбуот хизмати
814
