Сўнгги йилларда мамлакатимизда хотин-қизлар ва эркаклар учун тенг ҳуқуқ ва имкониятларни таъминлаш, хотин-қизларнинг жамият ҳаётидаги ўрнини мустаҳкамлаш масаларига алоҳида эътибор қаратилмоқда. Ўзбекистон Республикаси Энергетика вазирлигида ҳам бу борада қатор ишлар амалга оширилмоқда.
Хусусан, вазирлик томонидан гендер ҳаракати режасини амалга ошириш бўйича йўл харитаси тасдиқланди. Унда гендер ҳаракати режасини амалга ошириш бўйича ўтказиладиган тадбирлар, амалга ошириш механизмлари, муддати ва кутилаётган натижалар ўз ифодасини топган.
Йўл харитаси асосида Энергетика вазирлиги халқаро молия институтлари билан ҳамкорликда:
- кадрлар сиёсатини халқаро энергетика амалиёти асосида гендер муносабатларни ҳисобга олган ҳолда ишлаб чиқиш;
- Энергия лойиҳалари пудратчилари томонидан гендер зўровонлиги хавфининг олдини олиш, камситмаслик ва тенг имкониятлар яратиш сиёсатини жорий этиш;
- Аёлларнинг умумий бандилигини 5% га етказишнинг мақсадли кўрсаткичига эришиш мақсадида гендер тенгликни рағбатлантириш учун хусусий сектор иштирокидаги инвестиция лойиҳалари учун харидлар бўйича қўлланмага ўзгартиришлар киритиш каби бир қатор тадбирлар кўзда тутилган.
Ушбу тадбирлар натижасида қуйидаги натижаларга эришиш кутилмоқда:
- Ўзбекистон энергетика секторининг гендер тенлигига йўналтирилган таркибини шакллантиришда муаммоли ҳолатлар аниқланади;
- Кадрлар сиёсатида гендер муносабатлари ҳисобга олинади ва тенг имкониятлар кафолатларини яратиш сиёсатига киритилади;
- Гендер кўрсаткичлари умумий бошқарув ахборот тизимига жорий этилади;
- Ижтимоий масъулиятли энергетика компанияларининг корпоратив маданияти ва имиджи шакллантирилади;
- Энергетика ва инфратузилма лойиҳаларида гендер зўровонлиги хавфини минималлаштириш тизими яратилади;
- Ўзбекистон Республикасининг “Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида”ги қонунига мувофиқ тенг ҳуқуқ ва имкониятлар кафолатларини амалга ошириш механизми яратилади;
- Энергетика вазирлиги ва энергетика компаниялари ходимларининг малакасини мунтазам ошириб бориш тизими энергетика тармоқларида гендер ёндашувни жорий этиш соҳасида тўпланган илғор халқаро амалиётга мувофиқ яратилади.
Қайд этиш керакки, ёқилғи-энергетика комплекси, жисмоний оғир юкни назарда тутувчи мураккаб соҳа бўлгани учун бу соҳада аёллар кўп эмас. Бироқ, бугунги кунда ушбу масалага давлат даражасида катта эътибор қаратилганлиги сабабли, энергетика вазирлиги тизимида хотин-қизлар сонини кўпайтириш ва уларнинг яхши натижаларга эришиши учун барча зарур шарт-шароитлар яратилмоқда.
Хусусан, бугунги кунда энергетика вазирлиги тизимидаги ташкилотларда 13 915 нафар аёл ходим меҳнат қилмоқда. Улардан 354 нафари раҳбарлик лавозимларида фаолият юритади.
Ўзбекистон Республикаси
Энергетика вазирлиги Матбуот хизмати
882
